HSC Group Hospitality-ის დამფუძნებელი, გიორგი დოლიძე აღნიშნავს, რომ ტურისტულმა ნაკადებმა წელს ყველანაირ ნიშნულს გადააჭარბა.
როგორც ის "კვირასთან" საუბარში განმარტავს, გასულ წელთან შედარებით, ტურისტების ნაკადი 10-15%-ით არის მომატებული.

"ტურისტულმა ნაკადებმა წელს ყველანაირ ნიშნულს გადააჭარბა. როდესაც აპრილი იყო საშუალო სეზონი კოვიდამდეც და მერეც თბილისში, წელს მაღალი ნიშნულით გავიდა და 86% გვქონდა ჩვენ დატვირთულობა. მაისს რაც შეეხება, 90%-ით უნდა დავხუროთ და ზაფხულშიც 85-90% უნდა გვეჭიროს. მოლოდინი საკმაოდ კარგი გვაქვს.
აღსანიშნავია, რომ, გასულ წელთან შედარებით, ტურისტების ნაკადი 10-15%-ით არის მომატებული",- აღნიშნავს დოლიძე.

როგორც გიორგი დოლიძე ამბობს, ქვეყანაში განვითარებული ქაოსი ტურიზმის სფეროს დიდ დარტყმას აყენებს, განსაკუთრებულ პრობლემებს კი საპროტესტო აქციების ეპიცენტრში მდებარე სასტუმროებს უქმნის.

"აქციების ფონზე განვითარებული ქაოსი და დესტაბილიზაცია ურტყამს პირდაპირ ტურიზმს, როგორც ერთ-ერთ ყველაზე სენსიტიურს ეკონომიკის დარგში. მსგავსი სიტუაციები პირველი ტურიზმს ეხება ხოლმე და განსაკუთრებით იმ სასტუმროებს, რომლებიც ეპიცენტრში არიან, რუსთაველის გამზირს ვგულისხმობ. ამ ტერიტორიაზე სასტუმროებს თავისთავად, უუქმდებათ ჯავშნები იმიტომ, რომ ტურისტებისთვის დისკომფორტი არის გადაადგილების შეზღუდვა და ა.შ.
ჩვენი სასტუმროს შემთხვევაში, 1-დან 10 მაისამდე გვქონდა პატარა, 5-დან 7%-მდე გაუქმებები. ახლა უკვე ჩვეულებრივად, ყველაფერი ისეა როგორც აქამდე იყო. იმ სასტუმროებს, რომლებიც უშუალოდ ეპიცენტრში არიან აქციების შედარებით მეტი გაუუქმდათ. ტერიტორიის და გადაადგილების დისკომფორტის გამო ხდება ეს, თორემ "თბილისში აქციების გამო აღარ ჩავალთ" ასეთი რამ არ ხდება",- განაცხადა გიორგი დოლიძემ.

რაც შეეხება მოლოდინებსა და პროგნოზებს, როგორც HSC Group Hospitality-ის დამფუძნებელი ამბობს, ტურიზმის სფეროს წარმომადგენლებს მიმდინარე სეზონთან დაკავშირებით პოზიტიური მოლოდინები აქვთ.

"ფრენების რაოდენობამაც იმატა, ჩინეთიდან, ინდოეთიდან დაემატა. ახლა, ჩინეთიდან უფრო მეტი ტურისტი ჩამოდის, უვიზო მიმოსვლამაც შეუწყო ხელი.
წლევანდელი წელი ისევ 10% უნდა იყოს და სექტემბრის ბოლომდე, საშუალოდ, 90-იანი დატვირთულობა უნდა იყოს ჩვენ სასტუმროში.
უშუალოდ ქვეყნის ჭრილში, რეგიონებიც რომ გავასაშუალოთ, 70-75% უნდა გვქონდეს. საკმაოდ კარგი პროგნოზი გვაქვს",- აღნიშნა დოლიძემ.

წყარო: kvira.ge